-
Judith 7
- 1 Во утрие же объяви Олоферн всему воинству своему и всем людем своим, иже приидоша на споборение ему, воздвигнутися к Ветилуи и восходы горния предвосприяти и творити брань противу сынов Израилевых.
- 2 И воздвижеся в день той всяк муж сильный их: а сила их мужей ратных, мужей пеших сто седмьдесять тысящ, и коиников тысящей дванадесять, кроме приуготовления и мужей, иже быша пешцы в них, множество много зело.
- 3 И ополчишася во юдоли близ Ветилуи при источнице, и протягошася в широту от Дофаима даже до Велфема, и в долготу от Ветилуи даже до Киамона, иже есть противу Есдрилоиа.
- 4 Сынове же Израилевы, яко увидеша их множество, смутишася зело, и рече кийждо ко ближнему своему: ныне полижут сии лице земли всея, и ниже горы высокия, ниже дебри, ниже холми снесут тяжесть их.
- 5 И вземше кийждо орудия ратная своя и возжегше огни на башнех своих, пребываша стрегуще всю нощь ону.
- 6 Во вторый же день изведе Олоферн всю конницу свою противу лица сынов Израилевых,иже быша в Ветилуи,
- 7 и усматриваше восходов града их, и на источники града их найде, и предвосприя их, и пристави к ним ополчения мужей ратных, а сам возвратися к людем своим.
- 8 И пришедше к нему вси началницы сынов Исавлих и вси вождеве людий Моавлих и воеводы примория реша:
- 9 да послушает убо словесе владыка наш, да не будет сокрушения в силе твоей:
- 10 народ бо сей сынов Израилевых не уповают на копия своя, но на высоты гор своих, в нихже они живут, не бо есть удобно приити верхами гор их:
- 11 и ныне, владыко, не ратуй на них, якоже бывает рать ополчения, и не падет от людий твоих муж един:
- 12 пребуди в полце твоем, соблюдаяй всякаго мужа от силы твоея, и да обдержат отроцы твои источник водный, иже исходит из корене горы,
- 13 зане оттуду напаяются вси живущии в Ветилуи: и погубит их жажда, и отдадят град свой, а мы и людие наши взыдем на близкия верхи гор и оиолчимся на них в предохранение, еже не изыти из града мужу единому:
- 14 и истают гладом сами и жены их и чада их и прежде неже приити мечу на них, падут на стогнах обитания своего:
- 15 и воздаси им воздаяние лукавое, понеже бозкрамолствоваша и не сретоша лица твоего в мире.
- 16 И угодна быша словеса их пред Олоферном и пред всеми слуги его, и уставиша сотворити, якоже глаголаша.
- 17 И воздвижеся полк сынов Аммоних, и с ними пять тысящей сынов Ассурских, и оиолчишася во юдоли и предвосприяша воды и источники вод сынов Израилевых.
- 18 И взыдоша сынове Исавли и сынове Аммони и ополчишася в горней противу Дофима, и послаша от себе к югу и востоку противу Екревила, иже есть близ Хуса, иже есть при потоце Мохмур: а прочее воинство Ассириов ополчишася на поли и покрыша все лице земли: и шатры и припасы их разставишася в народе мнозе, и быша во множество много зело.
- 19 Сынове же Израилевы возопиша ко Господу Богу своему, зане возмалодушествова дух их, яко обыдоша всех врази их, и не бе возможно избежати из среды их.
- 20 И пребысть окрест их все ополчение Ассурское, пешцы и колесницы и конницы их, дний тридесять четыре: и оскудеша всем живущым во Ветилуи вся приятелища их водная,
- 21 и рвы оскудеваша, и не имеяху пити в сытость воды дне единаго, зане мерою даваху им пити.
- 22 И смятошася младенцы их и жены их и юноши, изнемогаху от жажды и падаху на стогнах града и в проходех врат, и не бе крепости ктому в них.
- 23 И собрашася вси людие ко Озии и князем града, юноши и жены и отроцы и возопиша гласом великим и реша пред всеми старейшинами:
- 24 да судит Бог между нами и вами, яко сотвористе в нас неправду велию, не глаголюще мирная с сынми Ассурскими:
- 25 и ныне несть помощника нам, но продаде нас Бог в руце их, еже низверженым быти пред ними жаждею и погублением великим:
- 26 и ныне призовите их и отдадите град весь в расхищение людем Олоферновым и всей силе его:
- 27 лучше бо нам быти им в расхищение, будем бо в рабы, и жива будет душа наша, и не узрим смерти младенцев наших во очесех наших, и жен и чад наших изчезащих душами своими:
- 28 свидетелствуем вам небом и землею и Богом нашим и Господем отец наших, иже отмщает нам по грехом нашым и по грехом отец наших, да не сотворит по глаголом сим во днешний день.
- 29 И бысть плачь велий посреде собрания всех единодушно, и возопиша ко Господу Богу гласом великим.
- 30 И рече к ним Озиа: дерзайте, братия, претерпим еще пять дний, в нихже обратит Господь Бог наш милость Свою на нас, не бо оставит нас в конец:
- 31 аще же прейдут сии, и не приидет на нас помощь, сотворю по словесем вашым.
- 32 И распусти людий ко своему ополчению: и на стены и башни града своего отидоша, а жены и чада в домы их отсла. И быша во смирении мнозем во граде.
-
-
King James Version (kjv)
- Afrikaans
- Albanian
- Arabic
- Armenian
- Basque
- Breton
- Calo
- Chamorro
- Cherokee
- Chinese
- Coptic
- Croatian
- Czech
- Danish
- Dari
- Dutch
-
English
American King James Version (akjv) American Standard Version (asv) Basic English Bible (basicenglish) Douay Rheims (douayrheims) John Wycliffe Bible (c.1395) (wycliffe) King James Version (kjv) King James Version (1769) with Strongs Numbers and Morphology and CatchWords, including Apocrypha (without glosses) (kjva) Webster's Bible (wb) Weymouth NT (weymouth) William Tyndale Bible (1525/1530) (tyndale) World English Bible (web) Young's Literal Translation (ylt)
- English and Klingon.
- Esperanto
- Estonian
- Finnish
- French
- German
- Gothic
- Greek
- Greek Modern
- Hebrew
- Hungarian
- Italian
- Japanese
- Korean
- Latin
- Latvian
- Lithuanian
- Malagasy
- Malayalam
- Manx Gaelic
- Maori
- Mongolian
- Myanmar Burmse
- Ndebele
- Norwegian bokmal
- Norwegian nynorsk
- Pohnpeian
- Polish
- Portuguese
- Potawatomi
- Romanian
- Russian
- Scottish Gaelic
- Serbian
- Shona
- Slavonic Elizabeth
- Spanish
- Swahili
- Swedish
- Syriac
- Tagalog
- Tausug
- Thai
- Tok Pisin
- Turkish
- Ukrainian
- Uma
- Vietnamese
Favourite Verse
You should select one of your favourite verses.
This verse in combination with your session key will be used to authenticate you in the future.
This is currently the active session key.
Should you have another session key from a previous session.
You can add it here to load your previous session.